Etdiyin heç bir işi səbəbsiz, etmək naminə etmə. Bu idmana da aiddir. İdmana başlamaqdan öncə hədəflərini və maneələrini təyin et. Bu yazı sənin hədəfinə görə kardio idmanı seçməyinə kömək edəcək. Səhv seçilmiş program ən yaxşı halda hədəfinə geç çatdıracaq səni, pis halda isə güclə qazandığın əzələlərin itkisinə səbəb ola bilər.

Kardio növləri:

1. Adi kardio

Aşağı-intensiv və qısa müddətlidən orta-intensiv orta müddətli hərəkətləri əhatə edir. Bu halda idman 30 dəqiqə və 1 saat arası olur. Buraya yavaş və ya sürətli gəzinti, velosiped sürmək və üzmək kimi fəaliyyətlər daxildir. İdmanın intensivliyini və müddəti fitness hədəfinə görə seçilməlidir. Yeni başlayırsansa, çəkin həddindən artıq çoxdursa və ya fitness səviyyən azdırsa yeriməkdən başlayıb sonra artırmalısan. Yüksək intensivli kardioya nəzərən daha az kaloriya xərcləsəndə, bədənin oksigen istifadəsi artır, və beləcə sənə lazım olan enerji üçün yağ əritmiş olursan.

2. Yüksək intensivli kardio

Bu halda daha yüksək intensivlə hərəkət edilir. Eləcə də xərclədiyin vaxt 30 dəqiqə ya da daha az olur. Adi kardio hərəkətlərinin eynisini daha intensiv olaraq tədbiq edilir (məs. yürüyüş qaçmağa çevirilir). Yüksək intensivli kardio zamanı bədən daha çox kaloriya işlədir.

3. Yüksək intensivli intervallı idman

Bu aralıqlı idman proqramında performansın tam halda 100%, dincəlmək halında isə 50% olur. Bu proqramdakı hərəkətlər və müddət sənin fitness səviyyəndən asılı olur. Yeni başlayan biri 15 saniyə sürətlə yeriyib 15 saniyə yavaş yeriyə bilər. Daha təcrübəli biri 30 saniyə qaçıb 15 saniyə sürətlə yeriyə bilər. Bu dəyişim 12-15 dəqiqə boyunca davam edir. Sonrasında daha sakit (məs. jamping jack) kardio hərəkətləri edilir. Bu idman proqramı sadəcə idman zamanı kaloriya işlətmir. Metabolizmanı sürətləndirir və idmandan sonra da kaloriya yandırmağa davam edir.

Fitness hədəfi də kardio seçəndə mühüm rol oynayır.

Əzələ inkişafı

Əgər hədəfin yağı normada saxlayıb əzələləri artırmaqdırsa aşağı intensivli kardio etməlisən. Əgər yüksək intensivli kardio hərəkətləri etsən bədənin əzələ artımı üçün lazım olan kaloriyaları da işlədəcək.

Fitness

Əgər hədəfin kardiovaskular fit olmaqdırsa yüksək intensivli kardio  və yüksək intensivli intervallı idmanı birgə etməlisən. Fitness səviyyən artdıqca idmanın intensivliyi və müddəti artmalıdır.  Əgər hədəfin əzələ kütləsini saxlayıb yağı əritməkdirsə onda aşağı və yüksək intensivli kardio hərəkətləri birgə etməlisən. Yüksək karbohidratla qidalandığın gündən sonra yüksək intensivli, ağırlıq idmanından sonra isə aşağı intensivli kardioya üstünlük verilməlidir.

İndi isə ən vacib məqama gəldik. Sadəcə bir növ hərəkətə, məsələn, qaçmağa bağlanma. Fərqli hərəkətlər, idman dərsləri də yoxla. Ən əsası isə məcbur hiss etmədən, sevə-sevə edəcəyin idmanı tapmağındır.